Rachat de La Méridionale : le STC dépose un préavis de grève pour le samedi 25 février
Dopu ch’idda sichi stata annunciata a ripresa di La Méridionale da u gruppu CMA-CGM, u STC di a cumpagnia hà spostu un primu avvisu di greva par sabbatu, u 25 di frivaghju.
Iss’avvisu, di 24 ori à ricunducia, rispondi à u pinseri di l’impiicati è à u bisognu di sicurizà l’acquisti suciali, innanzi ch’idda si faccia issa vendita.
Via un cumunicatu, Cori in Fronti, impinsiritu ancu iddu da issa vendita, parla d’un novu arrubbeghju à liveddu marittimu, in Corsica.
Pricisa u muvimentu «ch’issa cissioni di cuntrattu hè difesa in tuttu da l’articulu 56 d’ugni cuntrattu di a DSP. A vendita, à CMA-CGM, di i parti ch’idda t’hà STEF à a Méridionale, vali cissioni di cuntrattu».
Cori in Fronti ricusa «issu novu arrubbeghju, chì s’assumidda à l’affari successu tandu trà a SNCM è BUTLER-VEOLIA. U dirittori attuali di a Méridionale, missu in piazza u 9 di ghjinnaghju, hè l’anzianu dirittori ginirali lla SNCM, quiddu chì hà almanaccatu a liquidazioni lla cumpagnia, cù tutti i so pessimi cunsiquenzi. Chivi dinò, hè ripresa a cumedia di « l’omu ch’iddu ci voli, ind’iddu ci voli ».
Femu a Corsica hà dittu « ch’idda tuccaia à a Méridionale è à CMA-CGM di renda publichi è di cumunicà à a Cullittività di Corsica i cuntinuti di i so discussioni è l’evuluzioni pruspittati, da chì ugnunu posca virificà s’iddi sò in cunfurmità cù l’intaressi di i impiicati, di a Corsica è di i Corsi ».
U gruppu CMA-CGM circa à appacià à ugnunu, par ciò chì tocca à i so intinzioni in Corsica.
Via un cumunicatu, dici ch’iddu l’hà intesi i pinsera sindicali, è pricisa ch’issa ripresa « hà da permetta di ridrizzà a cumpagnia è di mantena i impiechi di i parsunala naviganti francesi suttu à bandera di primu righjistru».
U gruppu CMA-CGM brama di « cuntinuvà à sviluppà si in u Tarraniu, rinfurzendu à tempu a pusizioni llu portu di Marseglia è a filiera marittima francesa ».
