Procès de Bruno Garcia-Cruciani : la souffrance d'une femme recontextualisée lors de la première journée d'audience
A prima ghjurnata llu prucessu di Bruno Garcia-Cruciani, l’assassinu presuntu di Julie Douib, hè stata cunsacrata in gran’parti à i fatti è à u so cuntestu, quiddu d’innanzi è quiddu di dopu. Bruno Garcia-Cruciani hè statu à senta, senza calà l’ochja, u racontu d’issa ghjurnata di u 3 marzu llu 2019, fattu da i ciandarmi di Lisula.
Cusì, rimittindu i fatti in lu so cuntestu, si hè pussutu misurà u scartu trà i spiicazioni lli ciandarmi è quiddi di Bruno Garcia-Cruciani.
Rimittindu si ni à i signala telefonichi è à a videosurviglianza, i ciandarmi pensani chì l’omu suvitaia a so anziana cumpagna dipoi parichji ghjorna. À senta ni l’audizioni di parsoni liati à Julie Douib, a vittima avia issa imprissioni d’essa suvitata.
I ciandarmi dicini chì a inchiesta hà pirmissu di scopra un omu ulfanu, antipaticu è ghjilosu. Ci sò ancu arrighjistramenti audiò è videò di liti in casa lla mamma di l’omu, ind’iddu si faci viulenti incù idda, ancu puri ch’idda sichi tocca da a malatia d’Alzheimer.
Sandrine Didier, incaricata d’inchiesta lla ciandarmaria, hà parlatu di l’ascolti presi à nantu à u tilifuninu di Bruno Garcia-Cruciani, mentri a so prighjunia privintiva : i so parolli sò di una viulenza strema parlendu di Julie Douib, ma ancu di l’omu ch’idda fraquintaia : « s’iddu fussi statu quì u 3 di marzu llu 2019, si n’avaria presu una ancu iddu », dici Bruno Garcia-Cruciani à nantu à iss’arrighjistramenta. Da u so bancu in tribunali, l’omu, senza dì una parolla, laca spuntà calchì riazzioni chì dici ch’idd’ùn hè d’accunsentu.
Vennari, si cuntinuvighja l’audienza, cù parichji tistimugnanzi.
Sur le même sujet
