Nouvelle année et gros dossier pour la CTC : les transports maritimes
(A redazzioni d'Alta Frequenza) - Ultimu ghjornu di l'annata 2015 è prima cunfarenza di stampa di l'Esecutivu di Corsica sanu annant'à a gistioni attuali è assai calda di l'affari di a Corsica. Trasporti marittimi è rumenzuli, mai una mandatura ùn sarà principiata in una situazioni di un'urghjenza simuli è l'Esecutivu di Corsica ùn hà micca vulsutu perda tempu annant'à cartulari chì pudariani impeghjuriscia. U primu puntu hè custituitu di sicuru da u trattamentu di u prublema di i trasporti marittimi. Una linea marittima nova trà a Corsica è u cuntinenti hè lanciata ssu luni da u consortium Corsica Maritima. À partasi di marti, in riazzioni à què, i sindicati ani dicisu d'urganizà una greva pà fà cunnoscia a so scuntintezza contr'à ciò ch'elli cunsidareghjani com'è "una trava à u serviziu publicu". In più di què, u 29 di dicembri, a Méridionale hà ricusatu di signà u ducumentu annant'à l'ubligazioni di sottu dilegazioni trà ella stessa è a SNCM. Ssu ricusu s'hè fattu cù surpresa mentri ch'ella era stata dicisa u 17 di sittembri è senza spiecazioni serii sicondu a CTC. U Cunsighju Esecutivu hà datu l'ordini à a Meridiunali d'assicurà u serviziu, com'ellu a privedi l'articulu 43 di u cuntrattu di dilegazioni di serviziu publicu.
Steti à senta à Ghjuvan Filici Acquaviva, u presidenti di l'Uffiziu di i Trasporti.
