Municipales à Bastia : les réactions des candidats

Cù più di 35 % di i voti, Gilles Simeoni esci in prima pusizioni d’issu primu ghjiru di l’alizzioni in Bastia, cù deci punti di scartu cù Julien Morganti. Pari ch’iddu li cunvenga, à Gilles Simeoni, issu risultatu, ed hè beddu cuntenti di ciò ch’iddu feci in i quartieri sud.
Ma pà u sicondu ghjiru, l’affari sarà tuttu altru, cù a pussibilità d’un’unioni trà Julien Morganti è Jean-Martin Mondoloni.

U candidatu lla maiurità municipali conta quantunca fà fruttà issu scartu cù u solu Julien Morganti. Hà da accodda i soi da difinì a so stratigia pà u sicondu ghjiru, ma ùn hà dittu tanti affari di a pussibilità d’andà à discorra cù Sacha Bastelica.

Steti à senta à Gilles Simeoni.

Julien Morganti, par contu soiu, avia avirtutu a stampa : com’è di solitu, ùn ni daria riazzioni à l’escia llu primu ghjiru.

Fatta fini, hà cambiatu avvisu in a sirata, ma senza averta ni a ridazzioni d’Alta Frequenza.

Ùn pudareti tandu stà la à senta, a riazzioni di quiddu ghjuntu in siconda pusizioni pà issu primu ghjiru di l’alizzioni bastiaccia.

A parolla hè data dunqua à quiddi chì ùn isceddini di sprima si chè cù certi media. Cù i so 16,65 % di i voti, Nicolas Battini, u capifila di l’unioni di strema dritta trà u RN, a mossa palatina è l’UDR, era toccu da una certa emuzioni.

Dillusu mancu stampa ! Nicolas Battini si hè ralligratu d’entra in cunsigliu municipali di Bastia. Hè chivi, à senta lu, una tribuna par cumbatta u vechju mondu puliticu, cumincendu cù quiddu ch’iddu chjama u Rè di Corsica, Gilles Simeoni.

Ùn vulendu tantu indittà u mezu fiascu alitturali di François Filoni, u candidatu si hè filicitatu di a riescita d’iss’allianza à liveddu lla Corsica, masimu cù a intruta di Michel Chiocca in cunsigliu municipali di Portivechju.

Steti à senta à Nicolas Battini.

Pà Jean-Martin Mondoloni è i soi, era a suppa di musu.

Cù solu 11,6 % di i voti, hè luntanu bè da Julien Morganti, ma ancu da Nicolas Battini. Jean-Martin Mondoloni si hè dunqua risoltu à prupona una fusioni à Julien Morganti, par fà cascà à Gilles Simeoni è a so maiurità.

L’unioni, quantunca, ùn hà da essa cusì asatta à fà, à veda ni i diffarenzi trà i dui parsoni è i soi. Diffarenzi o ancu disaccordi. Ma pari dicisu Jean-Martin Mondoloni à metta à pena di dulci in l’amaru è à discorra à u più prestu, chì i listi ci voli à rimetta li à sei ori di sera marti.

Steti à senta à Jean-Martin Mondoloni.

Ancu puri ùn issendu qualificatu pà u sicondu ghjiru, Sacha Bastelica, cù i so 6,4 % di voti, hè cuntenti quantunca di a so alizzioni.

Cù i so 22 anni, a l’hà fatta à accodda 900 alittori in ghjiru à una dimarchja nova in Bastia.Issendu si alluntanatu da LFI, Sacha Bastelica conta issu mumentu da prima tappa di un rinovu di a manca in Bastia.

Dopu intesu si cù a so squadra, u candidatu, chì t’hà a pussibilità di fà fusioni pà u sicondu ghjiru, hà da stà à senta à Gilles Simeoni è à Julien Morganti innanzi di piddà una dicisioni.

Steti à senta à Sacha Bastelica.

Cù à pena 3,91 % di i voti, u partitu cumunistu cuntinuvigha u so longu è dulenti viacruci in Bastia.

Malgradu u prugrama beddu apprufunditu è una vulintà di cumbattu, Francis Riolacci è i soi t’ani i so panni chì astrittisicini ad ugni alizzioni nova. Colpa ni sarà à una basa militanti chì treca à rinuvà si.

Francis Riolacci si dici prontu à dà u favori à l’altirnanza, ma innanzi à dà un sustegnu direttu, ci hà da vulè à discorra quantunca.

Steti à senta à Francis Riolacci.