Les partis d'opposition nationaliste unanimement insatisfaits et inquiets du texte co-signé par Gérald Darmanin et Gilles Simeoni pour la Corse
Vennari à sera, u ministru francesu di l’internu, gérald moussa darmanin, è u prisidenti di l’esecutivu corsu ani signatu è publicatu unu scrittu cumunu, razza di un contu resu lla visita llu ministru in Corsica.
Ma i partiti naziunalisti ùn si sò assuciati à issu scrittu.
Jean-Christophe Angelini, à nomu llu PNC, hà dittu « ch’issu scrittu, trasmissu à a tricaticcia, hè da suttu bè à i dumandi lli mubilisazioni è à l’attesi pulitichi ».
Cori in Fronti nè mancu, ùn hà signatu issu ducumentu suppostu lià l’eletti lla CdC è u statu francesu. « Emmanuel macron, chì si hè framissu in i discussioni, hà dittu ch’idd’ùn si pudia varcà l’idea di a Corsica in a ripublica francesa, è ch’iddu ricusaia di stabilì dui catigurii di citadini. Cù issa pusizioni sticchita, hè chjusa a porta à una citadinanza corsa, a sola à guaranzì i dritti pulitichi llu populu corsu. Eppuri, issa nuzioni cunsinsuali era stata vutata cù una bedda maiurità, suttu à a prisidenza di Paul Giacobbi, trà u 2010 è u 2015 », hà dittu u partitu indipindintistu.
À nomu di Corsica Libara, Josepha Giacometti-Piredda hà dittu chì « i dichjarazioni ufficiali, cunfirmati da quiddi llu prisidenti-candidatu macron, dani cunfirma chì i intinzioni di parigi ùn sò à u liveddu di l’attesi pulitichi. I riprisintenti llu statu francesu ricusani u minimu ingagiamentu par ciò chì tocca à a libarazioni lli prighjuneri pulitichi : mancu ùn si parla di un almanaccu pà a so avvicinera, eppuri era annunciatu chì sò aghjà 20 anni à u più altu liveddu llu statu. Nudda chì parli di a ricunniscenza llu Populu Corsu è di i so dritti. Nudda par ciò chì tocca à a difinizioni d’unu statutu d’autunumia, chì à minima devi piddà in contu u puteri lighjislativu. In più di quissa, hè righjittata a cuufficialità pà a lingua corsa ».
