Le FLNC lance un appel à la résistance et revendique 16 attentats
Longu à quattru pagini mandati à Corse Matin, u FLNC hà fattu una cumunicazioni bedda pulitica.
L’urganisazioni clandistina hà rivindicatu sedici attintati, è hà lampatu una chjama à « aiutà a lutta, di manera attiva o passiva ».
Mintuvendu u dibattitu trà a Corsica è parigi, dici u Fronti chì « nisciun’accordu trà a Corsica è a francia ùn pò essa dittu storicu, sin’tantu ch’idd’ùn ùn ricunnosci u populu corsu da sola cumunità di drittu à nantu à a so tarra ».
U FLNC ni chjama à a risistenza, «à l’ora chì u statu francesu, via una cumissioni d’inchiesta parlamintaria, metti à palesu a so colpa è dunqua a so rispunsabilità in l’assassiniu d’Yvan Colonna, à l’ora chì u statu francesu si faci più duru in a riprissioni pulizziera, dindu à tempu via u so ministru di l’internu ch’idda ci hè a vulintà di u dialugu, à l’ora chì i nosci simbuli rilighjosi sò distrutti cù tanta viulenza, è chì a strema dritta ni prufitta par ficcà ci faciuli u so razzismu, da fà chì u sguardu si scanti da i culoni veri ».
Dici u FLNC chì « a lutta armata hà da durà sin’tantu chì i dritti vechji di u populu corsu, di a so lingua, di a so tarra sarani disprizzati è inghjuliati in casa soia, novu paradisu pà i culoni in circa di ricovaru».
« Iè, l’urgenza ci hè à veru. Hè l’ora di a scelta : quidda di a salvezza di a Corsica o quidda di a cullaburazioni cù quiddi chì facini da culoni », pricisa u muvimentu, chì dici in chjudenda « ch’idda hè ora di fà surghja i cundizioni di a missa in anda d’una piattaforma di risistenza patriottica, chì hà da duvè suparà i partiti pulitichi, l’associ, i sindicata è tutti i patriotti chì ci si ritruvarani ».
