Le Crédit Agricole de la Corse s'engage pour un accompagnement des salariés de la Corsica Linea
Corsica Linea è u Creditu Agriculu lla Corsica ani ufficializatu marti una cullaburazioni nova.
Si tratta d’accumpagnà i impiicati di a cumpagnia à liveddu bancariu.
Pà Yannick Torre, u dirittori di u gruppu d’agenzi d’Aiacciu, issa cullaburazioni metti in risaltu i valori fundamintali di a banca à u sirviziu llu tarritoriu.
Li tuccarà ancu à risponda à i bisogna in fatti d’alloghju, di risparru, di ritirati o d’accidenti lla vita, qual’ch’idda sichi a piazza di l’impiicatu in a cumpagnia, qual’ch’idda sichi a so età.
Dici Yannick Torre ch’iddi sarani i dirittori d’agenza à risponda à l’attesi di i impiicati.
A vulintà di fà ch’idda viaghji issa cullaburazioni tocca tuttu u tarritoriu, ind’iddi sò sparti 30 agenzi, ciò chì permetti ancu di lintà un ochji à i prublimatichi lla ghjuvantù, di u impiecu è di a furmazioni, com’idda a ci spieca Marie-Madeleine Battini-Sulmont, dirittori di l’agenza di u creditu agriculu di Purtichju, chì no’ stemu à senta.
Corsica Linea aspetta monda d’issa cullaburazioni. Masimu chì i impiicati sò in attesa di iss’accumpagnamentu bancariu.
Agnès Llovera, a dirittrici di i risorzi umani, dici ch’iddu hè impurtanti di fà travaddà insemi issi dui attori maiori di u tarritoriu, da prupona li unu spaziu parsunalizatu.
Issa cullaburazioni duvaria permetta di rinfurzà l’accumpagnamentu salariali, di riducia a frattura rurali, in u quadru di u impegnu sucitali di a cumpagnia.
Steti à senta à Agnès Llovera, a dirittrici di i risorzi umani di a Corsica Linea.
Sur le même sujet
