Le Direct

La Chambre des Territoires installée sans grands remous

(A redazzioni d'Alta Frequenza) - Sò ghjunti, erani (guasgi) tutti quì, pà a stallazioni di a Camara di i Tarritorii. Fora di calchì assenza, i quarantadui eletti di ssa camara chì certi qualificheghjani di chjoppula biota ani tinutu a so prima sissioni, sottu à a presidenza di u presidenti di l'Esecutivu di Corsica, Gilles Simeoni. U scopu : fà di ssa camara un locu di dialogu è di scambii custruttivi, è soprattuttu, i mesi passendu, truvà a manera di viaghjà chì ci voli da fà chì ssa camara, solu cunsultativa inde i fatti, t'avissi tuttu u so pesu nant'à i dicisioni pulitichi presi à l'Assemblea di Corsica. È à partasi di a prima sissioni, a parolla prisenti in ogni bocca era quilla di u rurali, cù parechji eletti prisenti. Eletti chì ani incalcatu cù ditarminazioni com'è u merri d'Ugliastru Jean Toussaint Morganti, o cù un sintimu cuntrariu com'è Jocelyne Mattei Fazi, merri di Rennu, tutta a nicissità di risponda à i prublematichi à parechji è cumplessi di tarritorii chì si poni senta sminticati certi volti. È s'è u cuncettu d'uppusizioni è di maghjurità ùn hè soca micca prisenti pà eletti numarosi, i voci di François Tatti, ma dinò pà Core in Fronte di Jean Luc Millo, ani purtatu una certa cuntradizzioni, pà ramintà chì ssa camara ferma dinò un'istanza propiu pulitica.