Interpellations: Valls s'en mêle
(A redazzioni d'Alta Frequenza) - Com'è a vi diciami duranti i nostri nutiziali passati, parechji parsoni sò stati arristati stamani (luni) in Corsica, 17 in tuttu, in Bastia, Luri è ind'u Valincu. D'appressu à l'Associu Sulidarità, chì chjama à a manifestazioni stasera à 7 ori davanti a basa militari d'Asprettu in Aiacciu è davanti u cumissariatu di Bastia pà sustena i militanti in guardia custodia, "u Statu francesi cuntinueghja a so pulitica di u tuttu riprissivu solu contr'à u muvimentu naziunali, ùn tinendu micca contu di a situazioni pulitica attuali." Com'è a facia rimarcà di manera assai ghjusta Ghjuvan Filippu Antolini sabbatu scorsu pà un affari chì ùn avia nulla à chì veda, pari chì u Statu sighi avvezzu à mandà à a Corsica un missaghju doppiu. Sarà daveru un azardu, dopu à a riunioni chì hè stata urganizata vennari scorsu in Parighji ind'u ministeru di a riforma di u Statu è di a dicintralisazioni, riunioni induva Manuel Valls era prisenti, u contrapesu hè intarvinutu ssu luni da mani. Intarrugatu oghji à l'uccasioni di un spiazzamentu ind'a Roche sur Yon, Manuel Valls hè vultatu nant'à ss'arristazioni. Hà bè cunfirmatu chì 140 gendarmi sò stati mubilizati pà quissi quì è dittu torna chì u Statu si voli attaccà torna è sempri "à i fundamenti, à l'urighjini di a criminalità di a maffia" in Corsica. Si pò custatà torna una volta chì Manuel Valls faci a leia sicura trà "quilli chì cunsidareghjani chì u splusivu devi essa utilizatu pà arrigulà prublemi ecunomichi è quilli chì volini impatruniscia di pezzi di tarritoriu". A criminalisazioni di a lotta pulitica naziunalista ferma dunqua l'arma favurita di u ministeru di l'Internu, di quissu quì com'è di tutti quilli passati.
Sur le même sujet
