Le Direct

Haute-Corse : vents forts prévus !

(A redazzioni d'Alta Frequenza) - I servizi di Météo France privedini da dumani (marti) in principiu di ghjurnata fin'è ghjovi da mani un ventu forti da meziornu punenti soprattuttu in Balagna, in Capicorsu è in muntagna, cù buffulati à u principiu di u fenomenu trà 70 è 100 chilometri par ora. Duranti u dopu meziornu di ssu marti, i buffulati pudarani trapassà i 120 à 130 chilometri par ora par asempiu in Capicorsu. Ss'episodiu hà da inghjinnà dinò acquati forti in Corsica Suprana sana, cù grandina è marosuli impurtanti annant'à u litturali uccidintali. A prifittura di Corsica Suprana faci sapè dinò chì par via di u risicu "focu di furesta", resu più gravi di pettu à ssa situazioni meteurulogica, a circulazioni di i parsoni, u staziunamentu è a circulazioni di i vitturi sò pruibiti, duranti tuttu ssu mumentu, annant'à i camini è stradi senza catramu di Bunifatu, u Fangu è u tarritoriu di l'Agriati. Da un'antra banda, par via di ssu cambiamentu di tempu, l'attività acquatichi è u fattu di bagnassi soprattuttu prisentani un periculu par via di i marosuli forti (da 2 fin'è 3 metri).