Football (Ligue 2) - Olivier Pantaloni retrouve l'AC Ajaccio aujourd'hui
(A redazzioni d'Alta Frequenza) - Ci ni dubbitavami, Olivier Pantaloni hà da ritruvà u so postu d'intrenori di l'AC Aiacciu oghji (marcuri) dopu à una seria chì avarà duratu più di una decina di ghjorni. Dopu chì Christian Bracconi sighi statu smessu di i so funzioni, u club aiaccinu circava un intrenori di sparienza. Olivier Pantaloni, chì hà demissiunatu di u so postu in u Tours FC, hè statu missu in furia in ordini priuritariu annant'à a short list di i dirighjenti. Ma ss'ultimu ùn era micca tuttu à fattu libaru, Jean Marc Ettori, u presidenti di Tours, ricusendu u divorziu cù l'intrenori di manera "amichevuli". Ssu prublema saria arrigulatu oghji da fà chì Olivier Pantaloni pudissi ghjunghja ind'u so novu club. Un club ch'ellu cunnosci strabè postu ch'ellu ci hà ghjucatu duranti parechji anni, da u 1995 fin'è u 2000, participendu à l'epupea aiaccina cù l'intrenori Battì Gentili. Olivier Pantaloni hà intrenatu dopu a squadra riserva eppo hè statu l'aghjuntu di Roland Courbis, Rudy Krol o ancu Gernot Rohr, prima di divintà intrenori numaru unu trà u 2008 è u 2012. Una sparienza cù u successu, postu chì u coach hà cunnisciutu una cullata in Liga 1, eppo un mantenimentu in prima divisioni. Hè dunqua un ritornu ind'a casa rossa è bianca pà Pantaloni chì duvaria dà a stabilità chì hè cusì ricircata à ssu postu quì dipoi dui anni oramai. A nutizia duvaria essa ufficializata da i dirighjenti di l'ACA ind'a ghjurnata.
