Football (Ligue 2) - Kylian Kaïboue quitte le SC Bastia, Florian Bianchini arrive, Mathieu Peybernès en approche
U SC Bastia, chì ripidda l’addistramentu luni, hè beddu attivu in u marcatu di i ghjucadori.
Dopu ad avè ingagiatu innanzi à a fini di l’ultimu campiunatu à Matéo Loubatières, u ghjovanu mezutarrenu di Montpellier, è à l’attaccanti di 18 anni Facinet Conte, u Sporting hà arrighjistratu issu sabbatu dui muvimenta.
Unu in u sensu lla partenza : u difindidori Kylian Kaïboue hè statu trasfiritu in Amiens un annu innanzi à a fini llu so cuntrattu. A indinnità di issu trasfirimentu ùn si cunnosci.
À spissu à nantu à u tarrenu dipoi dui staghjoni, si era amuffatu cù u publicu bastiacciu, malgradu i so qualità.
In u sensu lli ghjunti, Florian Bianchini, mezutarrenu uffinsivu di 22 anni, ghjunghji da Amiens, avendu ruttu u so cuntrattu cù a squadra picarda.
Anzianu internaziunali à menu di 19 anni, hà cuminciatu a staghjoni passata in siconda divisioni cù Amiens, po’ hè statu impristatu à Châteauroux, chì ghjucaia in Naziunali. Culandi, hà ghjucatu 17 scontri, hà marcatu dui volti è hà fattu dui passi impurtanti.
Avendu intarissatu un tempu calchì squadra ullandesa di prima divisioni, u ghjucadori, chì conta circa 20 scontri in siconda divisioni, 48 in Naziunali, è ch’era statu impristatu à Avranches mentri a staghjoni 2021/2022, hà dunqua sceltu u SC Bastia.
Parlendu di ghjunti sempri, saria guasgi par fà si a ghjunta – o piuttostu u ritornu – di Mathieu Peybernès. D’età 33 anni, u difindidori cintrali hà fattu, trà u 2014 è u 2017, 74 scontri in prima divisioni cù i Turchini.
Partitu senza vulè la di ghjinnaghju llu 2017, quandì a squadra si pittughjaia à difficultà finanziarii, hà ghjucatu annu da titulari cù l’Apollon Limassol di Cipru, dopu à cinqui anni passati in siconda divisioni spagnola.
