Football (Ligue 1) - C'est officiel pour Palmieri et presque pour Yatabaré
(A redazzioni d'Alta Frequenza) - U Sporting principia u so marcatu. Prima, Julian Palmeri hà da firmà pà dui anni oghji (marcuri) cù a squadra bastiaccia, ufficializendu un ritornu annunziatu dipoi un pezzu pà l’ecchisi ghjucaodri d’Istres. U mezu di tarrenu difensivu, chì pò ghjucà dinò nant’à u latu dirittu di a difesa, volta dunqua ind’a squadra chì l’hà furmatu, sei anni dopu. È com’è l’annunziavami arimani, Sambou Yatabaré, ghjucadori malianu di Monacu di 23 anni, firmarà dumani, u ghjornu di a ripresa di u Sporting. Hà participatu solu à novi partiti cù a squadra di u principi Albert a staghjoni scorsa, ma hè dighjà statu titulariu in Lega 1 cù Caen in u 2010-2011, duva ellu avia ghjucatu 25 scontri prima d'essa trasferitu in Monacu. Iss'ultimu hà resiliatu u so cuntrattu è s’hà da ingaghjà dunqua pà trè anni cù u Sporting, chì duvaria accoghja ghjucadori novi da quì à calchì ghjornu, frà altru in difesa cintrali è pà l’attaccu.
