Elections dans les TPE : le STC veut aller de l'avant
(A redazzioni d'Alta Frequenza) - U STC si pudarà bè prisintà à l'alizzioni prufiziunali ind'i TPE à a fini di l'annu. In fatti, u tribunali d'istanza di Parighji hà validatu vennari a candidatura di u sindicatu, andendu cusì in u sensu di a Corti di Cassazioni chì avia datu tortu calchì simana fà à i cintrali sindicali maiò CGT, FO, CFTC è CFDT. S'è ss'ultimi duviani fà un ricorsu, quissu quì ùn saria micca suspensivu è u STC si pudarà prisintà malgradu tuttu. Ramintemi chì dopu essa statu chersu da i grandi cintrali sindicali citati, ssu listessu tribunali avia annulatu à u mesi di lugliu scorsu a candidatura di u STC à l'alizzioni inde i TPE, incalchendu par asempiu nant'à u fattu chì quissu quì "purtava un'azzioni pulitica spicifica", ch'ellu battia à prò di "una discrimazioni arrimbata à l'urighjini regiunali trà l'impiegati", dichjarendulu "micca licitu" è "cuntrariu à i valori republicani". Vennari, u tribunali d’istanza di Parighji, cumpostu d’un’antra manera di pettu à u ghjudicamentu di lugliu scorsu par via di a dicisioni di a Corti di Cassazioni, hà suvitatu dunqua i racumandazioni di ss’ultima dendu raghjoni à u STC. Una suddisfazioni pà u secretariu generali di u sindicatu, chì brama oramai d’avanzà chjamendu più cà mai à a mubilisazioni pà ss’alizzioni inde l’intrapresi i più chjuchi da u 28 di nuvembri fin’è u 12 di dicembri.
Steti à senta à Jean Brignole.
