Échanges de préfets se félicitant de la mort d'Yvan Colonna : le PNC et Core in Fronte entre indignation et colère
U PNC è Cori in Fronti ani riagitu, dopu ch’iddi sichini stati publicati i discursati, via missaghjarii privati, di dui prifetti chì si filicitaiani di a morti d’Yvan Colonna.
U PNC dici ch’iddi sò « irrispittuosi è udiosi » issi parolli, è ch’iddi insignani « a poca cunsidarazioni chì certi alti rispunsevuli ani pà u nosciu populu ».
« Dumandà ch’idda volti a pena di morti, ralligrà si di l’assassiniu fattu da un prighjuneri islamistu, paragunendu i patriotti corsi à i nazisti, sò cosi chì no’ ùn pudemu suppurtà ».
« S’iddi cunsidarighji chì u naziunalismu corsu hè statu più piriculosu chè l’islamismu o u nazismu, l’invitemu, iss’aienti, à rileghja a so storia », dici u muvimentu puliticu.
A riazzioni hè a stessa par Cori in Fronti. U muvimentu indipindintistu dici chì, cù issi discursati, ci hè da rocia, è ch’iddi facini a dimustrazioni ch’iddu si tratta à veru d’una vindetta di statu.
« Da culandi bè à a lighjittima riazzioni di collara è di righjettu, ci tocca à ramintà chivi u rolu è a piazza di u corpu prifitturali in u dispusitivu auturitariu di u cintralismu, pà u mantinimentu di l’ordini d’accizzioni, di duminazioni è di suttimissioni ch’idda avvia a francia in Corsica ».
Cuntinuvighja u muvimentu dindu chì « i parolli schifiziosi, resi publichi, di issi prifetti in postu, insignani ch’iddi sò à prò d’iss’ordini murtifaru : par iddi, casticà o tumbà i naziunalisti corsi hè altru chè un sonniu. A so cauzioni murali à l’esecuzioni d’un patriottu chì sempri hà mughjatu ch’iddu era innucenti, fatta da un tarruristu islamistu in cori à una prighjoni cintrali bedda survigliata, dà creditu à a diminsioni pulitica di issu gestu micidiali ».
