Délégation corse à Paris: la position ministérielle
(A redazzioni d'Alta Frequenza) - Jean Michel Baylet, in un cumunicatu cortu diffusatu duranti u dopu meziornu, hè vultatu nant'à u so appuntamentu cù a raprisintazioni pulitica corsa in Parighji. U titulu stessu di u ducumentu hè propiu chjaru : si trattava bè di un scontru cù l'eletti di a Corsica nant'à a criazioni di a cullittività unica. Fora dunqua a scrizzioni di a Corsica nentru a Custituzioni, u statutu di residenti, a cuufficialità di a lingua corsa, o ancu un statutu fiscali specificu. S'hè parlatu dunqua di a cullittività unica, ma solu cù a visioni ch'ellu t'hà u guvernu nant'à quissa quì. I dumandi prisintati da l'eletti di a Corsica, vali à dì a difinizioni di i criterii pà a riurganisazioni di u tarritoriu, sò stati righjittati dunqua. Un'infrasata sottulineata in grossu in u testu ministiriali dimostra tutta a vulintà di quissu quì pà u trattamentu di l'affari di a Corsica. In fatti "u prughjettu d'urdinanza trattarà : di l'urganisazioni di i servizi di u Statu in Corsica ; di i dispusizioni specifichi à i missioni è à u parsunali di a futura cullittività unica ; di i cunsiquenzi à tirà di a criazioni di a cullittività unica nant'à i stabilimenti publichi, servizi, istanzi è urganisimi induv'ella hè membra a cullittività di Corsica." Tuttu hè dittu dunqua ed hè propiu pussibuli chì a riunioni chì veni à u mesi d'aprili ùn parmittarà micca di sorta da i ligni com'elli sò difiniti par avà.
