5 mai 2021 : Renaissance d'un FLNC Maghju 21

France 3 Corsica Via Stella hà annunciatu marcuri ch’iddu era natu un novu FLNC, chjamatu u FLNC Maghju 21.

Via una cunfarenza di stampa, u muvimentu clandistinu si n’hè presu à u statu francesu, chì sinu ad oghji ùn hà fattu « nisciun’gestu significativu ».

« U statu francesu ùn hà pinsatu mancu stampa à un trasfirimentu di suvranità pà a Corsica, com’idda si hè fatta pà tutti l’isuli llu Tarraniu chì sò anni è anni » dici u FLNCchì annuncia una « riurganisazioni tattica ».

«Ùn si hè pinsatu chè à una misara adattazioni, cù l’articulu 72-5, senza veru puteri puliticu, è cù u cuntrollu llu parlamentu francesu è di a sticchitissima custituzioni francesa » dici ancu u FLNC Maghju 21.

U muvimentu clandistinu dici chì l’unioni Pà a Corsica « ùn hè stata capaci à risponda à a sfida » issendu più « in a gistioni d’una cullittività chè in a custruzzioni d’una Nazioni ».

Ancu peghju, « l’eletti lla maiurità parini metta più energia in a so campagna senza pichju è in l’alitturalismu, da mantena a so piazza è andà sempri à circà i porta voti com’è tandu, chè par impona si cù a forza nata da a cridibilità di i so pruposti è azzioni cutidiani ».

Pà u novu FLNC, « a Corsica oghji hè in piriculu. Pari un battellu scemu, ribaldunatu di pettu à a ingurdizia di i gruppu finanziari, chì si piddani tutti i sittori strategichi, cù l’accunsentu di u statu francesu è cù a indiffarenza di l’eletti ».

Altru pinseri, pà u muvimentu clandistinu : « i sgaiuffi chì pesani sempri di più à nantu à l’ecunumia, u sistema puliticu è a sucità. U cancaru maffiosu pidda forza, a vendita è a cunsumazioni di droga si sparghjini è facini u lettu lla maffia ».

Eppuri, i clandistini ni chjamani l’alittori à « vutà in cuscenza pà i listi chì si rivindichighjani naziunalisti », arrimbendu si à « basi chjari ».
« I setti anni à vena ùn devini essa quiddi lla gistioni d’una Cullittività, ma quiddi di a missa in anda d’un veru prughjettu di sucità, da ghjunghja à l’emancipazioni naziunali llu Populu Corsu ».

U FLNC Maghju 21 dumandà à u Populu Corsu di pusiziunà si, « da culandi à l’alizzioni, à nantu à ugni tarrenu di a lutta di massa ».

« Hè ora di fà capiscia à a francia a forza di i rivindicazioni llu Populu Corsu, da ublicà u statu à piddà a via d’un veru prucessu di ricunniscenza di i dritti storichi llu Populu Corsu » dici in chjudenda u muvimentu clandistinu chì dumanda « a libarazioni di tutti i prighjuneri pulitichi ».

Écoutez un extrait de cette conférence de presse (Via Stella).