Visite de Manuel Valls : Première réaction de Gilles Simeoni
(A redazzioni d'Alta Frequenza) - U Prima ministru Manuel Valls è cinqui altri membri di u guvernu sò dunqua in Corsica ssu luni. Una visita chì hè principiata in Aiacciu è a prifittura cù a riunioni cunclusiva nant'à i gruppi di travaghju didicati à a lingua corsa, à a fiscalità, à i stituzioni è à l'intercumunalità. U puntu cintrali era custituitu di sicuru da l'urdinanzi rilativi à a criazioni di a cullittività unica. Più di dui ori d'intrattenu nanzi à un'accolta è discorsi à a Cullittività tarrituriali di Corsica. Ghjuvan Guidu Talamoni, Gilles Simeoni eppo Manuel Valls ani presu a parolla. U Prima ministru hà pussutu fà parechji annunzi à a tribuna, ch'elli sighini pusitivi o micca. A Cullittività unica nasciarà bè u 1a di ghjinnaghju di u 2018, è sarà cumposta par asempiu di una camara di i tarritorii in Bastia, ma chì ùn avarà micca u statutu di stabilimentu publicu. U Pianu Eccezziunali d'Investimentu sarà prulungatu, cù 471 millioni d'auri pronti à essa ingaghjati subbitu in u quadru di a legi NOTRe. Cuncirnendu l'arrestatu Miot, u regimi derugatoriu pudaria essa torna prulungatu, nanzi à un ritornu à u dirittu cumunu. À u nivellu di u cartulari di a lingua corsa, micca cuufficialità ma un pianu di furmazioni inde l'insignamentu pà una generalisazioni di u bislinguisimu inde tutti i scoli di l'isula. Infini, cuncirnendu u prublema di i prighjuneri pulitichi è di i ricircati, hè torna un INNÒ putenti pà l'annistia. U presidenti di l'Esecutivu di Corsica, chì hà salutatu com'è i dui altri intarvinanti a mimoria di l'anzianu Prima ministru Michel Rocard, sparitu duranti a dumenicata, hà tinutu un discorsu francu è chjaru. "Pà truvà una suluzioni pulitica, bisognu à essa dui", hà dittu par asempiu Gilles Simeoni. Li sò dispiaciuti annunzi torna micca abbastanza à l'altezza di ciò chì era aspittatu, troppu tennichi senza fondu puliticu veru.
Steti à senta à Gilles Simeoni.
