Vents violents en Corse
(A redazzioni d'Alta Frequenza) - À partasi da stasera (ghjovi) fin'è dumani (vennari) in principiu di dopu meziornu, a Corsica Suttana hè tocca da venti viulenti chì inghjennani marosuli forti. U ventu à punenti sarà più forti stanotti pà cullà da 60 fin'è 80 chilometri par ora in media cù buffulati trà 120 è 130 chilometri par ora, o ancu di più certi volti. I settori di u dipartimentu i più sposti sò i muntagni di u centru di a Corsica è tuttu u meziornu di l'isula. Iss'episodiu s'accumpagna da un mari forti cù marosuli alti fin'è 3 metri. In Corsica Suprana, issu ventu forti duvaria durà fin'è sabbatu in fin di dopu meziornu. A Balagna, u Capicorsu è u rughjoni di Bastia sarani i più tocchi. Pà issi lochi, i buffulati pudarani andà fin'è 130 chilometri par ora. U mari sarà forti, i marosuli alti trà 2 è 3 metri. Di pettu à issi cundizioni meteurulogichi propiu gattivi, a prudenza a più maiò hè racumandata pà qualsiasi attività chì pudaria essa disturbata è raprisintendu di colpu un periculu pà a pupulazioni. Da nutà d'altrondi chì di pettu à què, a grandi edizioni di u carnavali di Bastia privista issu sabbatu hè rimandata à un'antra data.
Sur le même sujet
