Le Direct

Vent violent : la Corse en vigilance rouge

(A ridazzioni d'Alta Frequenza) - Attenti chì a Corsica hè oramai in vighjulanza russa parvia lli venti viulenti privisti, da 6 ori di mani duminica, è sinu à mezanotti à u minimu. Dici Meteo france chì « u ventu di Punenti è Sudestu hè dighjà beddu forti, è certi buffulati ani toccu in 150/160 chm à l’ora in Capicorsu, andendu ancu à 166 à l’ora vicinu à Luri, è 138 in Lisula. Vintulioni di Punenti currini in lu Nordu lla Corsica issa duminica matina, è piddarani forza à veru, issi venta, in Capicorsu, in Balagna, in meza muntagna, è ancu in u Purtivichjacciu. In cor’di matinata, sarani tocchi i circondi bastiacci. S’aspettani chivi buffulati da 130 à 150 chm à l’ora, è puntu à puntu ancu di più. In Capicorsu, si pudaria ancu ghjunghja à 190 o 210 chm à l’ora. Tocca a meza ghjurnata è sinu à u dopu meziornu, issi vintuliona di Punenti ani da curra in i vaddi à Liventi di l’isula, sinu à a piaghja uriintali. I circonda di Portivechju, Conca, è a Ghisunaccia pudariani essa tocchi è bè. Ci s’aspettani à veru venti rabbiosi, è buffulati chì andarani da 150 à 170 chm à l’ora. In prima sirintina, l’affari si pudaria calmà un pocu in Cismonti, è po’ dopu in Pumonti. A prifetta lla Corsica hà da piddà misuri d’intirdizzioni, chì sarani resi publichi in un arrestu ancu a publicà. S’arricumanda à tutti d’essa cauti à veru è d’ùn viaghjà senza nicissità.