Vent fort en Corse : nouvel appel à la prudence
(A redazzioni d'Alta Frequenza) - U ventu soffia cù forza oghji (ghjovi) in Corsica, soprattuttu in Balagna, in Capicorsu, è in Corsica Suttana strema cù buffulati di ventu chì poni cullà certi volti fin'è 130 chilometri par ora. Un episodiu di ventu forti chì duvaria durà fin'è dumani à merzionu. A prifittura pruibisci a circulazioni annant'à i camini di l'Agriati, a furesta di Bunifatu, i muntagni di u Fangu, Manganellu è di Verghjellu da ssu ghjovi sei ori di mani fin'è vennari à sei ori di mani, è da vennari à ondeci ori fin'è sabbatu à sei ori di mani. C'hè un'eccezzioni inveci, pà l'apartura di a caccia vennari, i cacciadori t'avarani solu pà ssu ghjornu un'autorisazioni trà 6 ori di mani è 11 ori, rispittendu à tempu i reguli di prudenza nicissarii. A prudenza a più maiò hè racumandata dunqua par via di i marosuli chì poni essa custatati. U risicu di focu hè forti dinò in tutta a Corsica Suttana è in Corsica Suprana, cù un dispusitivu impurtanti chì hè missu in ballu par asempiu in ss'ultimu dipartimentu, cù guasgi 400 omi, ch'elli sighini spignifochi, furestieri, gendarmi o altri. Hè rammintatu ch'ellu hè difesu di fà fochi (dibbieri, fochi in furesta...) fin'è u 30 di sittembri. A pupulazioni devi firmà soprattuttu attenti à i risichi chì ghjunghjini da i tiri di focu d'artifiziu pà ssa dumenicata di u 15 d'aostu, propiu scundigliati par via di ssu tempu particulari.
Sur le même sujet
