Vaste opération de police des pêches à Porto-Vecchio
(A redazzioni d'Alta Frequenza) - L’agenti di l’unità cuntrollu pulizza di a Direzzioni Dipartimintali di i Tarritorii è di u Mari di Corsica Suttana ani cuntrullatu arimani (ghjovi) parsoni suspittati di rializà una pesca fora di legi à largu di Purtivechju. Annant’à u battellu, 30 chilò di pesci piscati cù arnesi pruibiti (palamiti cù 200 ami) sò stati scuparti. Ss’infrazzioni hè punita di 1 500 auri d’amenda. In leia cù a cumpagnia di gendarmeria di Purtivechju è cù l’autorisazioni di u Prucuratori di a Republica d’Aiacciu, u cuntrollu in mari hè statu suvitatu da una visita in casa à ssi parsoni. I quattru braccunieri, di naziunalità taliana, t’aviani in casa soia più di 60 chilò in più di pesci è una decina di gnaccari maiò, spezia prutetta cù un prilevamentu chì hè cunsidaratu com’è un delitu punitu cù un annu di prighjoni è 15 000 auri d’amenda, o ancu 7 anni di prighjoni è 150 000 auri d’amenda quand’ellu hè rializatu in gruppu urganizatu. Intesi da a pulizza duranti u dopu merzionu, ssi taliani sò surtiti libari, passarani davanti u tribunali currizziunali d’Aiacciu di ghjinnaghju di u 2015.
Sur le même sujet
