Vague de froid en Corse : point sur les différents dispositifs, prudence sur le réseau routier
(A redazzioni d'Alta Frequenza) - Un episodiu di fretu maiò tocca a Corsica dipoi ssa dumenica è hà da cuntinuà à u minimu fin’è dumani. Ghjunghji da u Nordu è fala d’una manera prugressiva da Cismonti à Pumonti. I sirvizi di u Statu sò mubilizati è assicureghjani una vigilia attiva. I centri d’accolta sò in capacità d’accoglia i parsoni senza casi. U numaru d’urghjenza 115 hè attivatu 24 ori è sarà in leia cù i sirvizi di succorsu (15, 17, 18 è 112). In Bastia, luni è marti, i centri d’accolta di notti « A fratellanza » è « S.Cascinelli » sarani aparti à partasi da 7 ori di sera inveci d’8 ori. U centru d’accolta di ghjornu di l’associu Fratellanza, chì t’hà un risturanti suciali, hà da apra à 7 ori è mezu. A Cità d’Aiacciu metti à dispusizioni di i senza casi u ginnasiu Pascal Rossini. A gistioni di l’accolta hè assicurata da a dilegazioni tarrituriali di Corsica Suttana di a Croci Rossa. S’ellu c’hè bisognu, notti d’hôtel sarani missi à dispusizioni. Hè propiu racumandatu di chjamà u 115 s’è vo truveti una parsona senza casa in difficultà in carrughju. Seti invitati à a prudenza a più maiò ind’i vostri attività fisichi di fora è duranti i vostri spiazzamenti par via di u risicu di cotru. Cuncirnendu a strada, a foci di Vizzavona, induv’ella hè cascata a nevi in quantità maiò ss’ultimi ori, hè pruibita à i veiculi articulati. I vitturi lebii poni circulà, solu cù arnesi spiciali. I sirvizi cumpitenti sò in traccia di caccià a nevi da a strada.
