Une seule maternité à Bastia dès le 1er juin
A sapiani ancu i ghjaddini, oramai hè ufficiali : a maternità di a clinica Maymard hà da chjuda più prestu chè privistu, toccu u primu di ghjunghju inveci di ghjunghja à a fin’di l’annu, parvia di a partenza anticipata d’un medicu. L’ultimu partu hè privistu pà u 26 di maghju, è cusì ùn ci sarà bisognu di trasfirì criaturu o mamma versu u spidali.
Toccu u primu ghjunghju dunqua, a sola maternità di Bastia sarà quidda di u spidali.
À senta ni à l’ARS, issa situazioni, chì hà mossu pulemichi è pinseri suciali, t’avaria parichji avantaghji, chì porta a guaranzia di a sicurità d’iss’attività à longu andà, via mezi umani adatti in quantità è spicialità.
Issa situazioni rinforza u liveddu IIB di a maternità di u spidali di Bastia, chì hè indispinsevuli à u tarritoriu. A rendi attrattiva pà l’interni è l’assistanti, via una crescita di l’attività è un ecosistema adattu.
Rinforza a prisenza tarrituriali via i cunsultazioni avanzati (cù i boni donni), liendu si à u mondu libarali è à a PMI, tinindu contu di l’equità tarrituriali.
Permetti ancu di sviluppà ufferti altri : u diagnosticu d’innanzi nascita, l’Assistenza Medicali à a Procreazioni (AMP), a presa in carica di i situazioni medico-psico-suciali dilicati.
Hè stata attaccata a rinuvera di i lucala di u spidali di Bastia : cù dui letta di più, si ni ghjunghji dunqua à 26. U bloccu ustitricali, inauguratu in u 2019, viaghja in cundizioni ottimi.
Sur le même sujet
