Une première pour la Corse et pour Air Corsica : le transport de greffons sur les lignes régulières
Hè a prima volta pà a Corsica è pà Air Corsica ch’iddi ani da essa traspurtati à nantu à i ligni rigulari l’organi di trapiantu.
Sinu ad avali, quand’una parsona chì facia donu d’organi era idintificata da a cuurdinazioni uspitaliera pà u prilevu d’organi è tissuti di u spidali d’Aiacciu, l’organi erani presi sistimaticamenti da i chirurghi capaci à fà u trapiantu, ghjunti da francia cù un avviò privatu. Ed hè sempri cussì pà u cori, i pulmona o u fegatu, chì devini essa rimissi in pochi ori à i ricivitori.
I reni inveci, sò i chirurghi di u spidali d’Aiacciu chì i piddani chì hè più d’un annu : cusì, si sfrancani u dispiazzamentu d’un medicu insitadori rinali.
Ma firmaia quantunca u pinseri lugisticu, ecunomicu è ambiintali : era sempri mubilizatu un avviò privatu par purtà iss’organi chì si ni devi fà u trapiantu in li 24 ori dopu à u prilevu.
Da suluziunà issu pinseri, Air Corsica, in cullaburazioni cù a cuurdinazioni uspitaliera pà u prilevu d’organi è tissuti di u spidali d’Aiacciu, hà zifratu un prutucollu di cuuparazioni cù l’Agenza di a biomidicina, da pudè purtà via i ligni rigulari iss’organi in Marseglia, Nizza, parigi, Liò o Tulusa.
Avendu oramai tutti i gradimenti rigulamintarii, a cumpagnia, in cullaburazioni cù i parsunala di scalu d’Air france in Corsica, hà fattu issi primi trasporti mentri l’ultima duminicata.
