Un vacancier suisse porté disparu en Corse
(A redazzioni d'Alta Frequenza) - Un turistu sguizzeru di una cinquantina d'anni hè sparitu dipoi calchì ghjornu. Partitu solu da Ginevra u 7 di lugliu pà una spassighjata annant'à u GR 20, era aspittatu pà u so ritornu in Sguizzera sabbatu scorsu. Ma, u turistu ùn hà micca presu l'avviò chì partia d'Aiacciu ssu ghjornu quì. A so famighja, chì ùn hà più nisun nutizia dipoi u 10 di lugliu, hà dicisu di chjamà l'autorità francesi par ch'elli ingaghjessini ricerchi; quissi quì sò stati vani par avà. U passaghju di ssu turistu hè statu rimarcatu vennari in a foci di Vizzavona, duva ellu hà passatu a notti in un hôtel, è saria statu vistu u lindumani pighjendu u trenu pà Corti. I gendarmi avariani lucalizatu u so telefuninu annant'à a cumuna d'Aleria.
