Un trafic de tortues terrestres partant de Balagne démantelé
(A redazzioni d'Alta Frequenza) - Un trafficu di cuppulati partendu da Balagna hè statu piantatu à u principiu di u mesi da i gendarmi. L'infurmazioni hè stata publicata da u ghjurnali La Nouvelle République ssu marcuri, ammintendu l'arristazioni l'8 d'aostu di trè parsoni inde ss'affari, cù un'inchiesta chì hà principiatu più d'un annu fà. Sicondu u ghjurnali, i servizii di l'Uffiziu di a caccia è di l'animali salvatichi di l'Indre ani sappiutu chì una donna d'urighini corsa, stendu nant'à a cumuna di Saint Pierre de Lamps in ssu listessu dipartimentu di l'Indre, vindia nant'à internet parechji spezii di cuppulati, certi essendu ricunnisciuti com'è prutetti à u nivellu naziunali. Daretu à ssu trafficu, sicondu l'inchiestadori, trè parsoni sò stati identificati : un babbu è u so fighjolu chì stani in Muru, in Balagna, è a fighjola, chì hè dunqua inde l'Indre. L'investigazioni avariani dimustratu chì i cuppulati erani presi ind'u so mezu naturali, allivati ind'a casa balanina, prima d'essa mandati inde l'Indre prima d'essa cumircializati trà 50 è 300 auri à l'unità, sicondu a spezia. In tuttu, 194 cuppulati di sei spezii sfarenti sò stati riguarati, prima d'essa rimissi ind'u so ambiu naturali o inde strutturi ricunnisciuti in Corsica. I parsoni suspittati pudariani essa cundannati à un annu di prighjò è à 15 000 auri d'amenda.
Sur le même sujet
