Un nouveau groupe clandestin revendique la série d'attentats en Corse
(A redazzioni d'Alta Frequenza) - Corse Matin annunzia ind’a so edizioni di vennari a nascita di un gruppu di militanti naziunalisti clandestini. U ghjurnali faci sapè chì una cunfarenza di stampa hè stata urganizata, è chì i trè parsoni prisenti à a tola rivindicheghjani « guasgi tutti l’attentati è i manifistazioni viulenti intarvinuti in Corsica ss’ultimi mesi ». È d’aghjustà chì ss’affari intarveni in a seguita di l’affari Reims-Bastia. I clandestini lampani un missaghju à u Statu : « custatemi oghji chì l’ambienti di paci missu in ballu da i naziunalisti ùn hè micca rispittatu da u Statu chì hè in una pustura di blucchimi sistematicu ». « In u cuntestu appaciatu ch’ella cunnosci a Corisca oghji, l’arristazioni numarosi, i prucessi è l’archiviazioni di i ghjovani naziunalisti da a ghjustizia di u Statu francesi sò attacchi chì ùn poni firmà senza risposta di pettu à u cuntestu puliticu ». È di pricisà chì « u nostru muvimentu ùn voli mancu appena disturbà l’eletti, si difendi u gruppu clandestinu. U nostru scopu hè di sustena a maghjurità tarrituriali. S’è certi vedini a nostra azzioni altrimenti si sbagliani », dicini quissi quì prima di compia « ùn femi micca parti di Corsica Libera, di Femu a Corsica, nè di u Rinnovu Naziunale ». (ritrattu : Corse Matin)
Sur le même sujet
