Triple homicide de Castirla : les investigations se poursuivent
(A redazzioni d'Alta Frequenza) - "Un'esecuzioni, un'imbuscata di una viulenza scarsa", eccu i parolli di u prucuratori di a Republica di Bastia, Dominique Alzeari, pà riassuma u triplici umicidiu d'eri (marti) ind'u Centru di a Corsica, trà Corti è Niolu. I fatti sò accaduti versu 3 ori di dopu meziornu à u Ponti di Castirla. Sebastien Mattei, 34 anni, Jean Gandolfi è Jean-Pierre Colombani, 24 anni tramindui, viaghjavani ind'una stessa vittura quand'elli sò stati tocchi da unu o parechji tiradori. U veiculu di i vittimi hà compiu a so corsa ind'un fussettu, sottu à l'impattu di i balli. Hè un automobilistu chì hà chjamatu i succorsi. Iss'ultimu chì circulava nant'à issa strada, cridia ind'un primu tempu à un accidenti di a circulazioni. Una volta sopralocu, i salvatori ùn pudiani cà custatà a morti di i trè omi. Pà ciò chì tocca à l'inchiestadori, chì ani missu subbitu in ballu un perimetru di securità largu, ani rilevatu un numaru impurtantissimu d'impatti nant'à a vittura è à l'inghjiru. Pari chì parechji armi sighini stati utilizati. Sebastien Mattei, Jean Gandolfi è Jean-Pierre Colombani sò dunqua cascati ind'una trappula. Pari chì u o i tiradori aviani sceltu u locu di i fatti, una strada sinuosa, duva a vitezza devi essa ridutta. Da u cantu di l'inchiesta, si prova à sapè s'è issu triplici umicidiu si pò avvicinà o micca da l'assassiniu di Maurice Costa u 7 d'aostu scorsu ind'u Ponti à a Leccia. Par avà malgradu tuttu, ùn ci hè nulla di sicuru è i servizii di pulizza ghjudiziaria è di gendarmeria principiani torna una volta custatazioni è investigazioni pà parechji ori.
Sur le même sujet
