Très forte pression incendiaire en Haute-Corse
(A redazzioni d'Alta Frequenza) - A prissioni sarà stata assai forti à u nivellu di i fochi in Corsica Suprana ssu marti cù parechji chì si sò dichjarati ind'u dipartimentu, duva c'era un ventu forti. U più impurtanti hè partutu versu 7 ori è 45 ind'u locu dittu Gattone ind'A Ghisunaccia; a superficia parcorsa hè di 190 ettari. Un sciffru chì duvaria essa largamenti più finu, i fiari avendu toccu campi, sepi è avvicinendu si da fiumicelli. Cinqui hangars agriculi ani brusgiatu dinò pà una superficia tutali di 400 m2, com'è dui "yourtes", mentri certi casi sò stati minacciati un certu tempu. In Oletta, à 7 ori è 47, u focu hè partutu vicinu à l'anziana caserna, brusgiendu 15 ettari di vegetazioni, mentri chì un sicondu hè partutu sempri nant'à a listessa cumuna, ma ind'u settori di Padule stavolta à 11 ori è 13, tucchendu 5 ettari di machja grossa. In San Fiurenzu, sempri à 7 ori è 47, una superficia di 5 ettari hè stata parcorsa da i fiari, à u nivellu di u Ponti di Farru. Infini ind'u Pitrosu, dui ettari sò stati brusgiati. Tutti ssi fochi sò fissati oramai; parechji decini d'omi, pumpieri com'è militari, à maiò parti di Corsica Suprana ma ancu di Corsica Suttana sò intarvinuti, ma ancu 3 Canadair, 2 Tracker è un elicotteru chì lampa l'acqua.
