Transports maritimes : Torna A Vignale
(A redazzioni d'Alta Frequenza) - Torna à Vignale ! Un affari chì s'hè pussutu verificà torna è chì si leia daveru à a situazioni chì ùn finisci più à u nivellu di i trasporti marittimi. Eppuru ùn era micca à u prugrammu - si duvia solu asaminà l'avisu di a Camara Righjunali di i conti nant'à a situazioni finanziaria di l'uffiziu di i trasporti - ma l'Assemblea di Corsica, torna una volta, hà vistu nascia un dibattitu infiaratu nant'à i trasporti marittimi. U valzu di i millioni d'auri - ùn si sà più troppu bè quali devi quantu è à quali - è l'ora tardi, ùn sò micca stati boni pà capiscia bè u cartulari, è micca solu ind'i ghjurnalisti. Ciò chì hè sicuru, hè chì ci pari chì l'accordu chì certi annunziavani com'è "fattu" trà l'uffiziu di i trasporti è i cumpagnii CMN è SNCM, i famosi 96 millioni d'auri, ùn sighi mancu appena fattu. A prumessa era stata fatta chì una suluzioni saria trova pà u principiu di lugliu; eppo hè stata pà a fin di lugliu è pari bè ch'è no andessimi ancu di più luntanu cà ssa data nova. Ciò chì hè sicuru dinò hè chì l'Esecutivu di Corsica hè luntanu, nant'à certi punti, da i cunclusioni di a Camara Righjunali di i Conti.
Paul Marie Bartoli, président de l'Office des transports.
Sur le même sujet
