Train : le suburbain sur la bonne voie en Corse
(A redazzioni d'Alta Frequenza) - U suburbanu ! Vera scummessa di i Camini di Farru di a Corsica dipoi parechji anni, hè in traccia di divintà una rialtà cù u sviluppu impurtanti di ssu mezu di trasportu, vera alternativa à a vittura. Fora di ciò chì si chjama "u tramway di Balagna", soprattuttu pà i turisti ci voli à dilla, u suburbanu s'hè sviluppatu di una manera assai impurtanti à u meziornu di Bastia. Ssa sola ligna, cù 32 treni oghji ind'i dui sensi, trasporta in ssu mumentu più di 380 000 passaghjeri à l'annu. A più nova in u suburbanu, a ligna di Mezana, chì ella dinò hè in traccia di divintà una vera alternativa. 11 passa è vena à ghjornu parmettini di fà falà eppo ricullà da a valli bassa di a Gravona nant'à a cità d'Aiacciu più di 120 000 parsoni ogni annu. Di pettu à a dumanda chì cresci, i primi treni di a mani sò carchi in fatti, u numaru di viaghji duvarà crescia è a capacità di i treni dinò.
Hè in traccia d'essa rializatu, com'ellu a ci dici Michel Stefani, u presidenti di i Camini di Farru di a Corsica.
