Tourisme : une saison qui démarre tambour battant en Corse
(A redazzioni d'Alta Frequenza) - I sciffri di u turisimu pà ssu principiu d'istati 2017 sò boni. O ancu bunissimi. In tutti i casi, pà ciò chì tocca u numaru di passaghjeri traspurtati in Corsica. Sicondu i sciffri prisintatida l'usservatoriu regiunali di i trasporti, a crescita dipoi u principiu di l'annu hè d'8,2%. U mesi di ghjunghju hè particularmenti bonu, postu chì in ssu mentri, u trafficu hà cunnisciutu una prugressioni d'11,8% di pettu à u 2016, vali à dì guasgi 97 000 passaghjeri in più. Ssa prugressioni forti apprufitta, sempri d'appressu à l'usservatoriu, à tempu à l'aereu è à u marittimu. Ssa crescita forti hè inghjinnata soprattuttu da u trafficu trà a Corsica è l'Italia, i scambii cù a Francia cuntinintali crescini dinò, ma d'una manera più misurata. Inde l'aereu, a nostra isula hà guadantu più di 50 000 passaghjeri di ghjunghju, grazia frà altru à i ligni nant'à Bordeaux è Liò, induva i prugressioni sò spittacularii andendu fin'è +27%. I ligni aparti da Air Corsica à u stragneru cunnoscini dinò u successu : +29% cù a Sguizzara è +43% nant'à a Belgica. Inde ssu rigistru, l'aeruportu d'Aiacciu hè sempri u più attivu di l'isula, mentri chì pà u mari, hè di sicuru u portu di Bastia chì ferma a porta d'intrata principali in Corsica. I sciffri di u mesi di lugliu cunfirmarani ssa tindenza ? U cuntrariu saria una surpresa.
Sur le même sujet
