Le Direct

Territoriales : tiraillements chez les Verts

(A redazzioni d'Alta Frequenza) - Tarrituriali sempri ma micca cù una candidatura, piuttostu cù una presa di pusizioni d'Europe Ecologie Les Verts assuciatu à a Manca Alternativa. Com'è à u nivellu naziunali, l'affari sò in francesi ind'è EELV è l'appruntera di i tarrituriali hà inghjinnatu tinsioni in u muvimentu eculugistu. In fatti, à l'uccasioni di un "referendum", Julia Sanguinetti, a secretaria generali attuali di u muvimentu pà a Corsica, hè stata missa in minurità, è propiu largamenti, pà ciò chì tocca a pusizioni d'EELV inde ss'alizzioni. Julia Sanguinetti, in un cumunicatu diffusatu sabbatu in fin di matinata, hà vulsutu spiccassi di a dimarchja intrapresa da les Verts. "Ùn semi micca d'accunsentu", dici ss'ultima in u testu, "cù a dimarchja ingaghjata nè annant'à u fondu, nè nant'à a forma; a cunfusioni attuali di u paisaghju puliticu in Corsica dumanda altru affari". Ùn si sà par avà chì sarani i cunsiquenzi annant'à a direzzioni di u muvimentu, ma Julia Sanguinetti si sprimarà annant'à ssu tema da quì à calchì ghjornu.

Steti à senta à Hélène Sanchez, portavoci di les Verts à l'uccasioni di a cunfarenza di stampa data cù A Manca Alternativa è Ensemble.