Territoriales : présentation de la liste L’avenir, la Corse en commun
(A redazzioni d'Alta Frequenza) - « Semi sicuramenti a sola lista di manca pà ssi tarrituriali » ! Sabbatu, nant’à a piazza Abbatucci in Aiacciu, a lista « L’avenir, la Corse en commun, l’avvene, a Corsica in Cumunu », fruttu di un’unioni trà la Corse Insoumise, Manca Alternativa è u Partitu Cumunistu Francesi, hè stata prisintata. À fiancu à u capimachja di a lista Jacques Casamarta, c’erani par asempiu Josette Risterucci, siconda, Michel Stefani, terzu, Dylan Champeau, 13esimu è anzianu candidatu à i legislativi in u sicondu circondu di Corsica Suttana, è chì faci parti di i 15% di ghjovani di menu di 30 anni nant’à ssa lista, o ancu Dominique Bucchini, anzianu presidenti di l’Assemblea di Corsica, 63esimu è ultimu, u postu u più simbolicu. Ancu s’elli ùn sò micca sustinuti da u capimachja di la France Insoumise, Jean Luc Mélenchon, chì avia qualificatu calchì simana fà l’iniziativa chì nascia di « cucina di gattiva qualità », l’omi è i donni chì portani ssa dimarchja volini custituiscia l’alternativa à u puteri naziunalistu attuali, ma dinò à i listi liberali di diritta è à u partitu di u Presidenti Macron, incapaci tutti quant’elli sò par avà di pighjà in contu l’impurtantissimu cartulari suciali, d’appressu à elli.
Steti à senta à Jacques Casamarta.
Sur le même sujet
