Tempête Domingos :bilan provisoire en Corse-du-Sud

A prifittura hà fattu u puntu, dopu à u passaghju di a timpesta Domingos in Pumonti.

Situazioni ginirali : 

U Pumonti, sta notti, era in vighjulanza arancina parvia di u risicu di scurruttoni, pieni è marosuli di summirsioni.

Ci sò stati l’acquati in quantità par tutta a notti in u dipartimentu, cù in certi loca 150 à 180 millimitra, in un cuntestu sinsibuli chì a tarra hè infusa parvia di l’acquati dighjà cascati.

Da anticipà l’evenimentu è cuurdinà a risposta di tarrenu, u centru uparaziunali dipartimintali hè statu missu in funzioni tocchi i cinqui ori è mezu lla sera, in prisenza di i sirvizia llu statu, di a Cullittività di Corsica, di a mirria d’Aiacciu, di u SIS 2A è di i forzi di l’ordini (ciandarmaria è pulizza).

Sò stati fatti ricunniscenzi privintivi in i sittori aghjà tocchi.

Mubilisazioni di i sirvizia :

- SIS2A : 19 CIS aparti, vali à dì 155 spinghjifoca è ufficiali mubilizati, trà i quali i squadri spicializati è a ceddula di i droni.

- UIISC 5 in alerta

- Forzi di l’ordini : ciandarmaria (70 parsoni), pulizza naziunali è pulizza municipali d’Aiacciu.
I sirvizia lla Cullittività di Corsica è di a Cità d’Aiacciu ani fattu monda intarvinzioni, masimu parvia di i sfraiati è di l’arburi cascati.

Bilanciu pruvisoriu :

Ad avali, ferti o parsoni spariti ùn si ni conta.

Sò fatti sempri i ricunniscenzi da misurà a situazioni in i sittori sinsibuli.

Parichji uparazioni d’evacuazioni è missa in sicurità di a pupulazioni sò stati purtati da i succorsi, SIS 2A è ciandarmaria. Dodici parsoni sò stati evacuati è riallughjati in i so famiddi o à torru ad iddi : una in Tavacu, dui in Bastilicaccia, quattru in Carbuccia, cinqui in Sarra di Farru (dui chì a so casa era adundata, trè ch’erani bluccati in vittura à nantu à una strada subaccata da l’acqua).

A circulazioni à nantu à i ponta di Cutuli è Carbuccia, taddata sta notti, hè ripresa sta mani.

U sittori di l’aeruportu d’Aiacciu hè in ussirvazioni, ma a circulazioni di l’avviò ùn hè disturbata par avali.

I mezi impurtanti di a Cullittività di Corsica (di tippu trattopala) sò aprudati da sgagià sfraiati è fanghimotti, masimu versu Carbuccia, Bucugnanu, Tavera, è à nantu à a strada d’Ocana è Todda.

I spondi di a Gravona è di u Prunelli sò stati tocchi bè da a cuddata di l’acqua, ghjunta à u so puntu altu trà trè è quattru ori sta mani : 6,37 metra pà a Gravona ; 3,04 metra pà u Rizzanesi.