Tatti-Sanguinetti: une alliance pas piquée des vers

(A redazzioni d'Alta Frequenza) - L'infurmazioni ùn ghjunghjia micca da u situ famosu A Piazzetta, emi verificatu, ma Europe Ecologie les Verts hà bè dicisu d'uniscia si cù François Tatti duranti l'alizzioni municipali à vena in Bastia. Ci vularia à dì piuttostu Julia Sanguinetti parchì u cumunicatu diffusatu ssu dopu meziornu (luni) da parechji militanti di u muvimentu laca spuntà certi dubbiti nant'à a leghjitimità di a dicisioni ritinuta. In fatti, Alfonsi Monique, Allegrini Marie Madeleine, Babin Hélène, Emmanuelli Pierre André, Fauconnier Denis, Fauconnier Marie Antoinette, Graziani Jean, Laredo Norbert, Sabiani Chantal, Simonpietri Agnès, Tramoni Francine, sò "surpresi d'amparà chì un'unioni s'hè fatta cù François Tatti à l'uccasioni di l'alizzioni municipali di Bastia". Par elli, u metudu hè stranu : cuntattu sclusivu cù un candidatu solu à mezu à d'altri, a maiò parti di i militanti d'AEIV gnurendu di manera tutali l'esistenza è u cuntinutu di i discussioni chì ci sò stati; eppo a dicisioni presa duranti una riunioni senza quorum veru di u Cunsighju Puliticu Righjunali di fà una cunfarenza di stampa pà fà un listinu di i punti d'accordu è di disaccordu ind'a perspettiva di un'unioni eletturali pussibuli, pà annunzià finalmenti a missa in piazza di un partenariatu. Pà dì la à l'accorta, un "ghjocu puliticu" chì hè nè chjaru, nè lisibuli. I ghjenti chì ani firmatu u cumunicatu si spiecani cù parechji ditagli nant'à u fondu: François Tatti, par elli hè à l'uppostu di l'idei purtati da Europe Ecologie Les Verts; è di cità : l'incineradori, u ruminzulaghju di Cervioni, u sustegnu à a sclassifica di zoni prutetti (Piana,Arone), u ricusu di vutà u statutu di cuufficialità di a lingua corsa, l'uppusizioni à l'avanzati istituziunali (u statutu di residenti par asempiu) è l'affirmazioni di un ghjacubinisimu rivindicatu. È u listinu ùn hè micca sanu. Dicini dinò ch'elli ricusani chì "raprisintanti" d'AIEV avissini dicisu di manera secca di fà un'unioni eletturali à a spiccera è senza nisun guaranzia pulitica nè nant'à u fondu, nè pà ciò chì tocca u cumpurtamentu di M.Tatti à u sicondu ghjiru. T'avaremi l'uccasioni di vultà nant'à ssu sughjettu di manera larga.