Stintu Aiaccinu : Lettara à l’Aiaccini

Lettara à l’Aiaccini,

Prima di tuttu vulemi ringrazià l’Aiaccini ch’ani fattu a scelta di sustena l’andatura di Stintu Aiaccinu cù più di 2000 voti sta dumenica. Stu risultatu in Aiacciu ci lascia spirà una bedda capacità di travagliu è di prugressioni pà l’avvena.

A voi tutti chì ci aveti sustinuti, vi ringraziemi di cori.

Issa dimarchja nova hè cumposta di donni è d’omi ch’ùn erani micca prufissiunali di a pulitica ma aiaccini, travagliadori, bramosi d’impignassi pà l’avvena di a nostra cità. Sò elli, i 49 donni è omi, ch’ani dati qualità è valori a sta dimarchja.

Avemi battutu a campagna micca contr’à l’altri furmazioni pulitichi ma prisintendu un prughjettu schiettu è ambiziosu. È sopratuttu, rispittendu l’altri listi è candidati.

Oghji, i risultati ùn ci parmettani micca d’essa prisenti à u sicondu giru, ma a nostra dimarchja firmarà è saremi bè prisenti nant’u tarrenu pà difenda a nostra visioni di u sviluppu aiaccinu. U stintu aiaccinu è a nostra visioni di l’identità, sò stati in cori di u nostru prughjettu postu chì semi primurosi di veda una cità d’Aiacciu corsa è fiera. Avemi fattu dinò a scelta di difenda una visioni di un naziunalisimu municipali apartu nant’à u mondu ecunomicu, giratu versu u
sviluppu di u nostru tarritoriu, è ch’ùn avia micca a paura di parlà di sughjetti di sucità : immigrazioni, sicurità, droga...etc. Un discorsu chjaru, di rompitura di pettu à a maghjurità municipali di sicura, ma dinò di pettu à l’altri naziunalisti di manca ch’ùn ani micca a listessa visioni sucitali di l’avvena di stu paesi è di ssu populu.

A nostra dimarchja firmarà ind’u latu di l’uppusizioni municipali di sicura. Postu chì semi più chi upposti à una strategia di una cità a 100 000 abitanti, sopratuttu cù a gestioni finanziaria assai pessima di a squadra di a maghjurità municipali in piazza. Semi ancu di più upposti à a so strategia pulitica, nanzituttu nant’à mubilità è l’alloghju. È cunsidaremi chì ci voli à fà ancu di più a u liveddu di u sviluppu ecunomicu è di a rivitalisazioni di u centru-cità.
Dumenica, firmarani trè listi. Di modu chjaru, vi dumandemi di mandà mancu un votu à a lista di a strema dritta francesa chì raprisenta una furmazioni pulitica nemica di a corsica è di u so populu dapoi sempri.

Pà u restu, cunsidarendu l’altra lista naziunalista semi stati assai surpresi è dillusi di a so pretenzioni è di u so disprezzu ricusendu di scuntrà ci pà avè une discussioni. Ani prifiritu niguzià cù i partiti di a manca francesa piuttostu chì di circà à aduniscia a famiglia naziunalista circhendu cumprumissi cullittivi. Allora chì si pudia circà una strada rispittendu a cuntradizzioni è parmittendu spazii di scambii. Di manera più larga l’adunita ò u sustegnu publicu ùn si poni fà a colpi di bucii, o manchendu di rispettu à l’onori di a ghjenti duranti tuttu una campagna.

Sta dicisioni pulitica di ricusà un incontru tra di noi, testimuneghja bè di a strategia missa in piazza dapoi maghju scorsu è di a vulintà chjara di lascià a nostra furmazioni pulitica in bordu di strada.

Tandu li salutemi listessa è li prighemi bona fortuna pà dumenica. Par compia, ùn semi nè clanisti, nè capuralisti, è cunsidaremi ch’ùn semi micca prupietarii di i nostri voti.

Di pettu à st’analisa pulitica, lascemi libari tutti quelli ch’ani fattu cunfidenza à Stintu Aiaccinu. È cunsidarendu a diversità di quelli chì ci ani vutati, li dimi di vutà dumenica in cuscenza, è di fà una scelta in cuerenza cù i so ideii.

Par contu nostru, cunsidaremi chì una strada ci hè è l’avemi da tena.

I candidati è i militanti di a dimarchja Stintu Aiaccinu