Stade Armand-Cesari : le SC Bastia juge la convention inacceptable
(A redazzioni d'Alta Frequenza) - Dopu à a cunfarenza di stampa di a Cumunità d'Agglumerazioni di Bastia pà prisintà a cunvenzioni pruposta à u SC Bastia è à u CA Bastia pà l'usu di u Stadiu Armand Cesari, a riazzioni di u Sporting ùn si hè micca fatta aspittà, ed hè assai forti. In fatti, u club ghjudicheghja i cundizioni proposti "micca accittevuli à tutti i nivelli, postu ch'ellu inghjinnariani a ruvina di u club", è voli "rammintà chì a cunvenzioni d'occupazioni di u 5 d'aostu di u 1994, chì ùn hè mai stata dinunziata da a CAB in 20 anni, hè stata trasmessa à a SAOS SC BASTIA eppo à a SASP SC Bastia, in cunfurmità tutali cù i dispusizioni di u codici di u sport. Ss'atti sò stati cumunicati à a Prifittura, chì l'hà validati". U Sporting stima dinò chì "l'intrattenu di u stadiu, chì hè assicuratu di modu sanu da u club oghji, ùn hè mancu apppena a mità di u costu annunziatu", è chì a pruposta di 700 000 auri pà l'intrattenu, qualificata di sopranaturali da u club, saria "una ruvina à curtissimu andà pà u Sporting". U Sporting dici torna infini a so voglia di "firmà un affittu pà un tempu longu" pà sviluppà u stadiu senza fà perda malgradu tuttu à a CAB a pruprietà di u so stadiu.
Sur le même sujet
