Soutiens au journaliste de Via Stella agressé par des supporters marseillais
A sizzioni corsa di l’Unioni di i Ghjurnalisti Spurtivi cundanna incù forza l’agrissioni contru à « Jacques Paul-Stefani, u so cullega di france 3 Corsica Via Stella, successa in a notti da sabbatu u trè à duminica u quattru di ghjunghju.
Dopu à u scontru di prima divisioni trà Aiacciu è Marseglia, issu ghjurnalistu d’imagini facia un riportu à nantu à a isciuta da u stadiu è u ritornu di i sustinidori marsigliesi versu a « fan zone » insignata da l’auturità.
Certi sustinidori ch’iddu filmaia si ni sò presi ad iddu, minendu lu ancu in faccia. A so camerà l’hè stata presa, dannighjata po’ ghjittata luntanu.
I ghjurnalisti spurtivi di Corsica mandani u so pienu sustegnu à u so cullega, è s’indignani d’iss’atti di viulenza chì sò in uppusizioni cù a libartà d’infurmà.
Radio Alta Frequenza hè ancu idda d’issu sustegnu, cundanna iss’agrissioni, chì hè un’uffesa à a libartà d’infurmà, è assicurighja à Jacques Paul-Stefani è à tutti quiddi chì si battini pà a libartà di a stampa di a so sulidarità.
