SNCM : les marins CGT votent la reprise du travail
(A redazzioni d'Alta Frequenza) - Hè stata dicisa in fin di matinata da l'assemblea ghjinirali di i marinari CGT : u travaghju ripighjarà oghji annant'à i battelli di a SNCM. Dopu à l'annunzii assai ottimisti d'arisera, si pudia aspittà una ditarminazioni più in furia di i grevisti pà a fin di a greva, ma pari chì un fattu novu avissi disturbatu tuttu u mondu. I socioprufiziunali di l'isula essendu ricivuti oghji da u Prima ministru, sariani stati cuntenti i marinari CGT di riceva da l'istanzi i più alti di u Statu a listessa cunsidarazioni, ciò chì hà postu prublema è dunqua ritardatu stamani l'assemblea ghjinirali. Prima chì a SNCM rimittissi in opara tutta l'urganisazioni di u so trafficu, ci hà da vulè aspittà forsa torna calchì ora, ma tuttu duvaria turnà nurmali abbastanza à lestra. In ssu mentri, in a Méridionale si travaghja à più pudè ghjustu appuntu pà riurganizà tuttu u trafficu. U Kalliste hè statu libaratu arisera ed hè partutu pà Tulò stamani à bon'ora. Sicondu i rispunsevuli di a sucità, ci vularà ad aspittà forsa a fin di a dumenicata prima di ritruvà una situazioni nurmali à 100% pà a circulazioni di i marcanzii.
Steti à senta à Victor Castellani, direttori di a Méridionale pà a Corsica.
Sur le même sujet
