SNCM : la demande de Michel Stefani à l'Assemblée de Corse
(A redazzioni d'Alta Frequenza) - Nova sissioni di l'Assemblea di Corsica dipoi stamani (ghjovi) è què pà dui ghjorni. Mentri chì raporti impurtanti com'ellu quillu di u bughjettu supplementariu di a CTC o ancu a criazioni di l'Uffiziu Fundariu di Corsica sarani asaminati à partasi di dopu meziornu, è prima à a visita dumani in Aiacciu di Marylise Lebranchu, a tradiziunali seenza di i quistioni urali hè stata urganizata stamani. À u prugramma soprattuttu, sfarenti quistioni rilativi à u cunflittu di a SNCM chì s'hè compiu chì hè pocu è di manera più glubali annant'à a prublematica di i trasporti marittimi. U cunsighjeru tarrituriali cumunistu Michel Stefani hà postu una dumanda annant'à ssu sughjettu. Hè vultatu par asempiu annant'à a dichjarazioni di u PDG di Veolia Environnement, Antoine Frérot, chì hà dittu ch'ellu era prontu à lacà pà un auru a participazioni in u capitali di a SNCM ch'ella t'hà Transdev, a cuintrapresa ch'ellu hà furmatu cù a Caisse des dépôts. Ammintendu dinò l'attitudina micca rispunsevuli di u guvernu in a gistioni di ssu cunflittu, o ancu annant'à u cartulari sempiternu di i cundizioni calchì annu fà di a privatisazioni di a SNCM, Michel Stefani hà cuncintratu a so intarrugazioni annant'à a famosa prucedura ghjudiziaria in Brussels, è hà dumandatu à l'Assemblea di Corsica di pighjà una dileberazioni ind'i quattru mesi chì venini pà rinunzià à dumandà i 220 millioni d'auri.
Steti à senta à Michel Stefani.
