SNCM : l'Etat et TRANSDEV ne confirment pas la commande de quatre bateaux
(A redazzioni d'Alta Frequenza) - A SNCM s'avvicina ogni ghjornu appena di più da u naufraghju. Arisera, una nova tappa hè stata francata duranti u cunsighju di survighjenza di a cumpagnia in Parighji, quandu à u mumentu d'ammintà a prurugazioni di a lettara d'intenzioni di cumanda di quattru battelli ind'u cantieri navali STX di Saint Nazaire, i raprisintanti di i dui azziunari maiò, u Statu è Transdev, ani dicisu d'andassini. Una partenza di a sala chì hà resu impussibuli u quorum, è chì hà inghjinnatu l'annulazioni di ssu puntu à u prugramma. Di fattu, luni da mani, a lettara d'intenzioni editata da a SNCM ùn avarà più nisun valori. L'inchietudini, dighjà assai forti, di l'intersindicali, si rinforza torna. Ùn arragnarà micca i tinsioni di più in più forti in ssu muvimentu, duva sempri arimani, a capitanaria di u portu di cumerciu di Bastia hè stata occupata da una quindecina di marinari di l'intersindicali CGT-FO-CGC-CFDT-SAMMM, inghjinnendu una mez'ora di ritardu annant'à i viaghji di sei ori è mezu. In un cumunicatu, a prifittura di Corsica cunsiglia dunqua à i parsoni in vittura d'essa prudenti è pazienti, ingorghi essendu privisti inghjiru à i porti di cumerciu di Bastia, Aiacciu, Calvi è Prubià ssa dumenicata induva turisti numarosi pruvarani à vultà in cuntinenti, ciò chì ùn hè mancu appena sicuru pà quilli chì ani risirvatu un viaghju cù a SNCM.
Sur le même sujet
