SNCM: l'affaire se corse
(A redazzioni d'Alta Frequenza) - "Un lugiziali segregaziunistu in a SNCM !" Eccu ciò ch'ellu dici avè scupartu u STC di i marinari duranti un'occupazioni di u scagnu di a direzzioni di i battelli in Marseghja. U sindicatu naziunalistu insisti cù forza : u ducumentu infurmaticu trovu sopralocu dimostra bè chì a cumpagnia hà fattu dipoi sempri una sfarenza assai chjara quandu si trattava d'impiegà pà a staghjoni. Pà l'annu 2014 solu, sicondu u ducumentu, a cumpagnia cù i battelli turchini hà firmatu 344 CDD à cuntinintali contr'à 42 solu à residenti corsi. Ind'u cuntestu assai particulari di a situazioni in a SNCM, induva i minacci chì pesani annant'à l'impiegu trapassani largamenti u quadru simplici di l'impieghi pà a staghjoni, era un affari benvinutu di rializà un'uparazioni simuli? Eccu a dumanda franca ch'è no avemi postu à Alanu Mosconi, è ci hà rispostu di manera diretta dinò ellu. Annant'à st'affari, u direttori di i battelli Eric Lacoste hà ricusatu qualsiasi discriminazioni à l'impiegu pà i corsi. D'appressu à ellu, a direzzioni ùn hà mai datu nisun cunsigna in ssu sensu quì, è i criterii pà impiegà duranti a staghjoni si facini solu di pettu à l'anzianità, senza tena contu di u locu di residenza. U direttori ricunnosci chì i dumandi d'infurmazioni annant'à i pussibilità d'intrata è pà navigà si facini grazia à un numaru verdi missu in ballu dipoi u 2008. Ricunnosci malgradu tuttu chì ssu numaru ùn hè tantu cunnisciutu da i marinari di staghjoni parchì pochi dumandi sò fatti annantu.
Steti à senta u raprisintanti di u STC di i marinari.
Sur le même sujet
