SNCM et mobilisation des socioprofessionnels à Bastia : la tension monte
(A redazzioni d'Alta Frequenza) - A liberazioni di u Kalliste di a Méridionale, a securisazioni di un quai pà a Corsica in Marseghja, l'indennisazioni grazia à un ghjustificativu di i preghjudizii di ssu cunflittu è un pianu di cumpensazioni di cinqui anni pà riparà i disguasti ecunomichi, eppo un pianu di prumuzioni turistica di trè anni pà cambià a maghjina di a destinazioni Corsica imbruttata da a greva, eccu i rivindicazioni purtati stamani (marcuri) da i socioprufiziunali aduniti davanti a prifittura di Corsica Suprana. Dipoi stamani dunqua, più di 500 parsoni manifisteghjani pà dumandà à u Statu di pighjà i so rispunsabilità in u cartulari di a SNCM. Prima azzioni forti, baracucchi è parsichi sò stati rinvirsciati davanti a prifittura, eppo dopu una dilegazioni hè stata ricivuta da u prifettu di Corsica Suprana, dilegazioni allargata à i pulitichi com'è Gilles Simeoni, François Tatti o Joseph Castelli. Nisun veri neguziazioni ma i manifistanti ani dumandatu à essa missa in rilazioni cù u Prima ministru, ma ùn hè micca statu pussibuli. Pari chì par avà, a dilegazioni ùn avissi uttenutu nulla ciò chì inghjenna a collera di a ghjenti prisenti chì hà lampatu frutti nentru à a prifittura. À ssu mumentu pricisu, hè impussibuli di dì chì hè u statu attuali di a situazioni. In fatti, una parti di i manifistanti stima chì a rumpitura hè bè quì è ch'ellu ci voli à passà à altri azzioni, un'antra parti dici pà contu soiu chì una suluzioni di cunciliazioni ferma pussibuli uttenendu novi appuntamenti ancu in Parighji. U purtonu di a prifittura hè statu sarratu cù cateni. Una parti di i manifistanti hè andata dopu ver di i lucali bastiacci di a SNCM, è ci sò intruti.
Steti à senta à Christophe Chiorboli pà u cullittivu.
