Si n'hè andatu à l'eternu Christophe Mariani
Artistu, imprisariu, insignanti à Polytechnique, ma supr’à tuttu difindidori è prutittori di a lascita d’Angelo Mariani è di u so vinu, Christophe Mariani si n’hè andatu issu primu d’uttrovi.
Era u prisidenti è dirittori ginirali di u « Vin Tonique Mariani / Coca Mariani ».
Sò anni è anni ch’iddu si battia par fà ricunnoscia u vinu Mariani da virsioni nativa di ciò ch’avia da duvintà u Coca Cola.
Parvia d’issa lutta, a marca internaziunali avia ricunnisciutu via u so situ di Belgica è Lussemburgu chì u so famosu soda era una « varianti unica » di u vinu corsu Mariani invintatu in u 1863.
Christophe Mariani era ancu musicanti, artistu priziatu da u mondu culturali isulanu.
Facia sparta a so spirienza di vita à studianti, masimu in « Polytechnique », ind’iddi erani ricunnisciuti i so capacità di imprisariu.
Christophe Mariani era una bedda parsunalità, cù tanti i qualità umani, ed era un amicu d’Alta Frequenza, ch’iddu fraquintaia da ziteddu.
U so intarru si farà marti u setti d’uttrovi à dui ori, in catedrali d’Aiacciu.
A so salma partarà à un’ora è mezu da u Spaziu Picchetti, ind’idda ricivarà l’aienti a famidda à parta si da duminica u cinqui d’uttrovi, à cinqui ori.
À a so famidda, à i soi tutti tocchi da issu dolu, prisintemu i nosci dulianzi sinceri.
Riposa in Santa Paci, amicu.
Sur le même sujet
