Sévices sur des animaux à Bastia : le couple condamné à de la prison ferme
Issu ghjovi, passaiani in tribunali Franck Baldin, 49 anni, è a so cumpagna Noëlle Romero, 48 anni, chì sò in ditinzioni pruvisoria dipoi duminica. Sò stati arristati dopu ch’iddi sichini stati trovi dicini d’animali maltrattati in lu so alloghju llu Carrughju Drittu, in Bastia. A scuparta hè stata fatta dopu ch’idda sichi intarvinuta a patrona d’un ghjacaru arrubbatu.
Ghjudicati pà arrubbecciu è turmenti fatti à issu ghjacaru, ma dinò pà i gattivi trattamenti fatti à 25 ghjatti, 5 ghjattulini, 4 ghjacari, una ghjaddina, una currachja, è 14 culumbuli accatamansati in i 35 m² di quiddu appartamentu, cù un’igiena di i più pessimi, i dui parsoni ani dittu ch’idd’ùn ani mai vulsutu maltrattà iss’animali. Noëlle Romero dici ch’iddi sò i so fiddoli, è ch’idda li vulia dà una siconda scianza, à isss’animali cacciati da u carrughju, ch’aviani tutti tanti malatii, com’è a rugna o u catarru lli ghjatti, ma dinò i pulgi.
A prucuratrici lla ripublica di Bastia, pensa idda chì issu coppiu, fendu cusì, ùn hà datu una siconda scianza à l’animali, ma ch’iddu l’hà cundannati, inveci. Hà chersu dui anni di prighjoni, cù unu fermu, contru à Franck Baldin. Hà chersu quattordici mesa cù sei fermi contru à Noëlle Romero. Hà dumandatu dinò una intirdizzion difinitiva d’avè animali è un’ublicazioni pà iss’aienti di fà si trattà.
A difesa hà dumandatu ch’iddi sichini lintati, dindu ch’idd’ùn erani boia, ma parsoni fora di mondu è in addisperu affittivu. Franck Baldin hà ancu ricunnisciutu ch’iddu minaia a cumpagna.
U tribunali currizziunali di Bastia, dopu d’avè fattu a so dilibarazioni, hà cundannatu à Franck Baldin à 18 mesa di prighjoni cù 8 fermi, è à Noëlle Romero à un annu di prighjoni cù 4 mesa fermi. U coppiu si ferma dunqua in prighjoni. Sò dinò tocchi da una intirdizzioni difinitiva d’avè animala, d’un’ublicazioni di fà si trattà, è custretti à pagà 700€ di danni è intaressi à parichji associ è à a prupriitaria di Caramel, u ghjacaru arrubbatu.
Sur le même sujet
