Session extraordinaire de l'Assemblée de Corse : une partie des élus retrouve l'hémicycle aujourd'hui
Sissioni strasurdinaria di l'Assemblea di Corsica vennari : pà a prima volta dipoi u cunfinamentu, una parti lli cunsiglieri hè vultata, fisicamenti, supr’à locu.
Dopu à l’annunciu fattu da u prisidenti lla ripublica francesa, chì privedi u ritornu ublicatoriu à a scola u 22 di ghjunghju, l’Assemblea si hè riunita in urgenza.
Ramintemu chì a CdC, prupriitaria lli stabilimenta llu sicondu gradu, avia dicisu d’ùn metta li à dispusizioni di l’elevi, chì i cundizioni d’una sicurità sanitaria ùn ci erani, pà un’apartura senza risichi.
Arimani, a maiurità hà prisintatu un raportu, chì pidda nota di a dicisioni prisidinziali francesa.
Par idda, a riintruta ufficiali sarà quidda di sittembri. Ma hà quantunca dicisu, in un cuntestu sanitariu chì pari più chietu, di permetta issa riintruta anticipata.
« Ci voli à essa chjari, ùn sarà micca una riintruta, u 22 di ghjunghju : sarà un neci ! » hà dittu cù forza Josepha Giacometti.
U dibattitu, fatta fini, hè statu quiddu lla dicisioni prima lla maiurità tarrituriali chì par Jean-Martin Mondoloni, hè andata da culandi bè à i so dritti.
« Avemu presu dicisioni par pruteghja i corsi, in u mentri chì u statu ùn facia chè sbuciardà si », l’hà rispostu Romain Colonna, chì no’ stemu à senta.
