Sécurité routière en Haute-Corse : le travail sera encore important en 2015
(A redazzioni d'Alta Frequenza) - Ghjovi, u prifettu di Corsica Suprana, Alain Rousseau, è u prucuratori di a Republica di Bastia, Nicolas Bessone, sò vultati annant’à i sciffri di a delinquenza in u 2014, sciffri annant’à chì vultaremi ind’i nostri nutiziali chì venini. Ma ani amintatu dinò i statistichi di a securità stradali, piuttostu boni in u 2014, parchì s’è u numaru d’accidenti cresci appena com’è u numaru di feriti, ci sò stati dodeci morti annant’à i stradi di u dipartimentu in u 2014, contr’à diciannovi l’annu nanzu, cù com’è puntu pusitivu a morti di una sola parsona à pedi o chì cunducia una motò à mezu à i dodeci morti censati. Sciffri boni chì sò stati appena sguassati par via di un principiu d’annata assai pessimu, postu chì dipoi u 1a di ghjinnaghju, sei parsoni sò morti annant’à i stradi di Corsica Suprana, frà i quali quattru pà u solu è tarribuli accidenti di u Ponte à a Leccia. A riprissioni sarà dunqua a parolla maestra quist’annu, è micca solu pà i parsoni chì viaghjani troppu à lestra, ma dinò pà quilli chì a legi cunsidareghja com’è cumplici. Ind’u casu pricisu di l’accidenti di u Ponte à a Leccia, s’è l’inchiesta duvia dimustrà di manera difinitiva chì u cunduttori di a vittura hè mortu inde l’accidenti, u prucuratori s’hà da riservà u dirittu di ghjirassi contr’à i stabilimenti di notti chì avariani pussutu dà quantità impurtanti d’alcool senza inquadrà i parsoni cuncirnati.
Steti à senta à Nicolas Bessone, u prucuratori di a Republica di Bastia.
Sur le même sujet
