Sacralisation du 5 mai: Frédéric Thiriez campe sur ses positions
(A redazzioni d'Alta Frequenza) - U presidenti di a Lega di Ballò Prufiziunali, Frédéric Thiriez, era in Bastia issu luni, duva ellu hà scuntratu u prifettu di Corsica Suprana, Alain Rousseau, u presidenti di u cunsighju esecutivu, Paul Giacobbi, u merri di Bastia, Emile Zuccarelli, è infini i dirighjenti di u Sporting Club di Bastia. Un prugrammu chì ùn era tantu chjaru ancu pà a stampa, chì cridia prima chì ci duvia essa una cunfarenza ind'un hôtel risturanti, nanzi di cambià di locu à l'ultima minuta, Frédéric Thiriez ùn vulendu micca parlà à i ghjurnalisti fin'è tandu. U presidenti di a LFP hà spiecatu a so ghjunta pà parlà di i sforzi fatti da u Sporting Club di Bastia à u nivellu di a securità iss'ultimi settimani, è mustrà a so leia forti, sicondu ellu, à a Corsica è à u so ballò. Altru puntu trattatu, a sacralisazioni di u 5 di maghju, ch'ellu hà scartatu torna, ghjudichendu chì i minuti di silenziu ind'i stadii bastavani, o u fattu ch'ellu ùn fussi micca ghjuntu in Furiani l'annu scorsu pà dà u titulu di campionu di Lega 2 à u Sporting, ch'ellu rigretta sicondu ellu.
Ecoutez-le.
